NATÓ - ríki þrýsta á Ísland að gera meira

Utanríkisráðherra Íslands fundar stíft vegna breyttrar heimsmyndar. Eins og alltaf eru Íslendingar ekki vel undirbúnir né þátttakendur. Það þarf ekki að lesa sögu lengi til að átta sig á hvernig stórveldapólitíkin virkar. Hún hefur verið eins síðastliðin 6 þúsund ár eða síðan borgríki urðu til.  Ríki mynda bandalög, herja á önnur ríki eða verða fyrir hernaði. Sérstaklega er staða örríkja erfið og hættuleg.

Ísland er örríki.  Það þarf að vera í bandalagi til að verja sig, það er staðreynd. Það eru tveir valkostir fyrir Íslendinga. Að vera undir pilsfati stórveldis í vestri eða bandalags í austri. Íslendingar hafa veðjað á báða kosti. En geta þeir gert það til langframa? 

Mestu mistök Íslendinga er þeir stofnuðu íslenska lýðveldið var að tryggja ekki sjálfir eigin varnir. Ekkert ríki er í raun sjálfstætt ef það getur ekki varið sig. Þetta er eins og vera ósjálfráða einstakingur sem býr heima í foreldrahúsi. Hann þarf að standa eða sitja eins og aðrir segja.

Áfram halda Íslendingar að fara í kringum heita grautinn. Jú, utanríkisráðherra segir að bandamenn þrýsti á Íslendinga að gera meira með eigin varnir og Íslendingar ætli að gera eitthvað í málinu! En hann passar sig á að segja strax að Ísland ætli að vera áfram herlaust!

Hver er lausnin? Að hlaða undir löggæslustofnunina Landhelgisgæslu Íslands sem er ekki herstofnun, heldur löggæsluaðili.  Þetta er feluleikur sem Íslendingar hafa komist upp með síðan 1944 vegna hernaðarlegs mikilvægis.  Ísland væri ekki herlaust ef það væri staðsett við hliðina á Lúxemborg. Nú hefur komið í ljós að verndarinn er "búllí", hrekjusvín sem herjar á vini sína. Bloggritari hefur varað við þessu að heimurinn er hverfull og ekki er hægt að treyst á eitt eða neitt, ekki einu sinni "vini".

Íslensk stjórnvöld verða að gera meira og tryggja raunverulegt sjálfstæði Íslands. Það kostar pening og það þurfa Íslendingar að skilja. Á hverjum morgni yfir morgunkaffinu síðan 2008 hristir bloggritari höfuðið yfir hvernig landinu er stjórnað. Það verður áframhald á því.

 

 

Athugasemdir

[Jóhann Elíasson, 5.4.2025 kl. 11:22]

Ég trúi nú ekki ÖLLU sem hún segir því enn standa yfir deilur um það hvort bæði hún og fyrrverandi Utanríkisráðherra hafi sag satt og rétt frá ástæðu lokuna sendiráðsins í Moskvu, fyrir tveimur árum. Og er þá eitthvað frekar til í þessum ummælum hennar??????

[Birgir Loftsson, 5.4.2025 kl. 12:29]

Já Jóhann, ég hef líka mína efasemdir.  Því miður er íslenska jafnaðarstjórnin - ESB stjórnin að reyna að troða okkur inn í ESB og er að tengja varnarmál við þessa umsókn. Innganga í ESB og þátttaka í Evrópuher. 

Mér líst ekkert á að við förum inn í einhvern Evrópuher sem verður hvorki fugl né fiskur. Það er nefnilega þannig að þegar vinir manns lenda í slagsmálum, þá dregst maður inn í slík átök nauðugur. Það hefur geysað stríð í Evrópu í 2500 ár, bara smá hlé núna.  Eins með Kanann, hans stríð verður okkar stríð ef barist verður á Atlantshafi.  

Draumastaðan væri að Íslendingar væru hlutlausir og sæju um sínar eigin varnir líkt og Svisslendingar. Því miður er það ekki í boði.