Samfélag og saga

Hvað kostar að stofnsetja fastaher á Íslandi?

Varnarmál eru mál málana í dag. Íslenskir ráðamenn eru að krafsa í bakkann og reyna að sýna viðleitni til að efla "varnir" Íslands. Veruleiki stórveldis pólitíkurnar hefur neytt þá niður á jörðina því í ljós hefur komið, eins og bloggritari hefur minnst á í áratugi, að engum er treystandi.

Staðreyndin er að ríki eiga bara hagsmuni, ekki vini. Hvernig væri hér umhorfs ef Trump væri með sama yfirgang gagnvart Íslandi og hann sýnir Grænland? Allt brjálað.

Nóta bene, Grænlandsmálið snýst ekki um öryggishagsmuni Bandaríkjanna, þeir geta fengið eins margar herstöðvar og þeir vilja á Grænlandi í samvinnu við Dani. Það er enginn að stoppa Trump. Pólitík hans er augljós öllum þeim sem vilja sjá, hann vill gera Norður-Ameríku, frá Panama til Grænland með Kanada innanborðs að nýjum Bandaríkjum! Ríki á par við Rússland að stærð. En aftur að hagmunum Íslands.

Margt hefur verið sagt um varnir Íslands og nánast allt út í hött. Fullyrðingum án tölfræðilegra gagna slengt fram og sagt, svona er þetta, Íslendingar eru varnarlausir og við getum ekkert gert okkur til varnar. Og þá er farið gamalkunnar leiðir, ruglast á bakarann og smiðinn, og sett fjármagn í lögreglu og Landhelgisgæsluna! Þetta er bara ekki sami hlutinn.

Hverjar eru aðgerðir núverandi ríkisstjórnar? Jú, það á að fjölga í lögreglunni um 200 manns. Gott og vel, gott fyrir varnir gegn glæpum. Svo á lappa upp á ræfilslega Landhelgisgæslu! Afgömul og úreld eftirlitsflugvél Landhelgisgæslunnar á að hætta að vera í landamæraeftirliti á Miðjarðarhafi (FRONTEX) í 11 mánuði og láta sjá sig við Ísland meira en einn mánuð á ári! Svo segir forstjóri LHG að þeim vanti ekki tæki, heldur mannskap! Það hefði verið hægt að dekka eftirlitið með lögsögu Íslands (lögreglu aðgerð, ekki her aðgerð) með því að kaup ódýra dróna frá Ísrael (kostar 200 milljónir kr. ódýrasta týpan) og LHG fékk að láni um árið með góðum árangri. Landhelgin gæti verið vöktuð úr lofti 24/7, því enginn er um borð og einn maður á jörðu stjórnar úr stjórnstöð.

Svo er keyptur ómannaður neðansjávardróni, hér kallaður kafbátur af Íslendingum! Íslensk uppfinning og sjálfsagt ódýr. Ekki vitlaust, því að sæstrengirnir sem liggja til Íslands eru óvarðir. En erfitt er að sjá að einn neðansjávardróni geti vaktað sæstrengina alla leið og alltaf. Ef óvinir ákveða að slíta sæstreng, er ekkert sem kemur í veg fyrir það. Dæmin úr Eystrasalti sanna það.

Bloggritari hefur reiknað út kostnaðinn við stofnkostnað fastahers. Þessir útreikningar eru í skýrsluformi og verða ekki birtir hér. Aðeins heildarkostnaður. Hér er miðað við undirfylki hers (e. company) upp á 250 manns. Þetta er lægsta mögulega stærð hers. Tekið er mið af annars vegar hefðbundið fótgöngulið og hins vegar vélvætt fótgöngulið sem lágmarks mannskapur og tvö eldflauga batterí til að verja höfuðborgarsvæðið og Suðurnesin.

Grunn undirfylki fyrir Ísland myndi kosta að minnsta kosti 3.486.250.000 m.kr. að stofna og 2.091.750.000 m.kr. + á ári að viðhalda.
Vélvæddur herafli kostar ca. 6.972.500.000 m.kr. + til að setja upp og 3.486.250.000 - 8.367.000.000 m. kr. á ári til að viðhalda.
Tvö eldflauga batterí. Kostnaður er ca. 14. milljarðar króna ef notað er svipað eldflaugakerfi og Norðmenn hafa.

Heildar stofnkostnaður ef allt er tekið með inn í reikninginn, 18,5 milljarða króna ef grunn fótgöngulið ásamt tveimur eldflauga batteríum er valið en 21,0 milljarða króna ef vélvætt fótgöngulið er valið.

Árlegur rekstrar kostnaður er 2-8 milljarðar króna. Er þetta óyfirstíganlegt?

Með því að taka inn NATÓ í dæmið. gæti dregið verulega úr kostnaði með því að bjóða upp á þjálfun, búnað og samnýtingu herstöðva. Í raun er mjög ólíklegt að Íslendingar einir beri upp kostnaðinn, því að sjóðir NATÓ og Bandaríkjanna eru digrir og fyrirséð að þeir verða stærri næstu misseri. Sjá: NATO Security Investment Programme (NSIP).

Að lokum. Arnór Sigurjónsson talar um í bók sinni „Íslenskur her“ um að lágmarks fjöldi í íslenskum her yrði að vera um 1000 manns og 500 manna varalið á stærð við herfylki (e. Battalion). Ólíklegt er að pólitískur vilji sé fyrir svo stóru skrefi. En það má vinna að þessu í skrefum.

Allra ódýrasta leiðin er að stofna hér heimavarnarlið, sem gæti gengið undir heitunum Þjóðvarðlið eða Varnarlið. Rekstur slíkra eininga er ódýr. Sem dæmi starfar Þjóðvarðlið Bandaríkjanna aðeins í einn mánuð á ári en foringjarnir eru atvinnumenn.

Launakostnaður (250 manns) er um 500 milljónir+. Búnaður, rekstur og vopn: Ef notuð væru létt skotvopn, drónar, farartæki og loftvarnakerfi gæti stofnkostnaður verið frá 2-10 milljörðum króna (fer eftir umfangi). Aðstaða og þjálfun: Ef nota ætti núverandi innviði (t.d. öryggissvæði við Keflavík) væri kostnaður lægri.

Veikleikinn eftir sem áður verður loftvarnir. Það er alveg ljóst að Íslendingar hafa ekki efni á að kaupa herþotur. Það verður áfram úthýst til bandamanna. En eldflauga batterí er raunhæf leið.

Áður en menn froðufella kaffið er þeir lesa þetta, þá geta þeir huggað sig við að þetta eru aðeins hugleiðingar bloggritara sem kosta ekki krónu!

Íslensk pólitík sér til þess að lítið verður gert og það sem verður gert, verður í skötulíki! Löggurnar í LHG verða látnar leika sóldáta áfram, kannski annar drátturbátur - fyrirgefið, varðskip, keyptur á tombólaverði og gamlar þyrlur leigðar.

Af hverju? Af því að er enginn hefð fyrir hermennsku og her sem stofnun í íslenskum nútíma. Það er enginn þekking né menning, né málsvarar slíkt (kallaðir stríðsæsingarmenn ef menn impra á að kannski væri ekki svo vitlaust að læsa húsinu og hætta að treysta á nágrannanna?), aðeins áhugalausir stjórnmálamenn sem fjalla um varnir í hjáverkum og af illri nauðsyn, því umheimurinn lætur íslensku loftbóluna ekki í friði.

Meginflokkur: Bloggar | Aukaflokkur: Stríð | 15.3.2025 | 12:13 (breytt kl. 12:16) | Facebook

Athugasemdir

Íslendingar tíma ekki að borga í löggæslu, hvað þá í varnir.

Birgir Loftsson, 15.3.2025 kl. 12:40

Þetta eru orð í tíma töluð, skrifuð. Það sem mér þykir ljóst er að ungdómurinn á þessu landi hefur ekki snefil af þjóðerniskennd og heldur varla þeir sem eldri eru. Þar er vandinn. Flestir hanga í snjallsímum og telja það allt sem skiptir máli.

Segjum sem svo að ungt fólk yrði aftur þjóðernissinnað. Þá myndi það skilja að sjálfstæði felst líka í því að taka ekki við andlegum áhrifum af hvaða tagi sem er að utan, í formi Hollywoodfroðuómenningarinnar.

Samkvæmt þínum pistli skilur þú alveg að þetta snýst ekki um útilokunarstefnu eða einangrunarstefnu, heldur að velja af vandfýsi og að vera gagnrýninn á bandamenn og einnig að geta þó friðmælzt eins og hægt er, það er að segja ákveðin hlutleysis- og friðarstefna sem hentar bezt svona lítilli þjóð eins og okkar sem getur ekki haft efni á miklum vörnum.

Grænlandsmálið snýst já um að Trump vill stækka Bandaríkin eins og Pútín vill stækka Rússland.

Mér finnst að friður ætti að ríkja meira, en að berjast fyrir sönnu sjálfstæði, það er ekki að berjast gegn Rússum eins og Úkraínustjórn gerir og að vilja samlagast ESB. Það er ávísun á ósjálfstæði og undirokun.

Ég hef skilið þessar hugmyndir um íslenzkan her vegna þess að ég geri meiri kröfur til sjálfstæðis en hingað til flestir gera. Slíkur her myndi verja landið ef til innrásar kæmi, og hann gæti haldið uppi lögum og reglu betur gagnvart eiturlyfjagengjum og glæpagengjum sem hér hafa fest sig í sessi.

Loftvarnir yrðu sennilega áfram í samstarfi við NATÓ, eða nýtt bandalag.

Þótt að ég vilji frið eins mikið og hægt er þá veit ég að her fylgir þjóðerniskennd, nokkuð sem mér finnst vanta á þessu landi.

Einnig, mér finnst Þórdís Kolbrún og fleiri hafa gert mistök varðandi Rússland. Hlutleysisstefna er bezta friðarstefnan. Ég er ekki mikið fyrir NATÓ, nema í neyð úr því að ekkert skárra býðst.

En gott að vekja athygli á þessu og þora að skrifa um þetta, eins og þetta er ekki það sem margir skilja hvað gengur útá.

Fyrir mér snýst þetta um endurreisn þjóðerniskenndarinnar.

Ingólfur Sigurðsson, 15.3.2025 kl. 18:21

Takk fyrir Ingólfur. Veit vel að ég er ekki að skrifa um "vinsælan" hlut, því að Íslendingar hafa vanist því að borga ekki varnar reikninginn og vilja það ekki yfir höfuð. En ég skrifa um það sem er ábótavant. Ég skrifaði t.d. grein um bráðamóttöku Landspítalans í vetur og benti á hægt væri að setja upp bráðabirgða móttöku fyrir utan. Svo hitti ég fyrir tilviljun lækni af bráðamóttökunni og ég sýndi honum grein mína. Hann var mjög hrifinn og það var í fréttum fyrir 2 vikum að Landspítalinn er að setja nákvæmlega eins aðstöðu og ég talaði um í grein minni. Tilviljun? Kannski hefur maður áhrif til góð....hver veit.

Birgir Loftsson, 15.3.2025 kl. 21:33