Bókun 35 aftur á dagskrá en nú með öfluguri málsvara

Í ljós kom að það varð aðeins hlé á aðförinni að stjórnarskrá Íslands er Sjálfstæðisflokkurinn fór frá völdum. Það vakti og vekur enn undrun bloggritara að Sjálfstæðisflokkurninn skuli hafa stutt þetta mál, að því virðist gegn grunngildum flokksins. Sjálfstæðismál ekki lengur á dagskrá hjá flokknum?

En sjálfstæðismál virðast horfin úr huga núverandi og fyrrverandi Sjálfstæðismanna sem nú eru í Viðreisn. Hvað hélt fólk eiginlega að það fengi úr pökkunum er skoðanakannanir sýndu að tveir flokkar með mesta fylgið, Samfylkingin og Viðreisn vildu ljóst sækja um aðild að ESB? Að það sé í lagi að kjósa þessa flokka? Auðvitað fáum við ESB aðildarkosningu (í lok kjörtímabilsins svo að málið eyðileggi ekki ríkisstjórnarsamstarfið) og bókun 35 verði samþykkt á þessu þingi!

Það er næsta ljóst að bókun 35 verður samþykkt, með samsetninguna á Alþingi eins og hún er. Þingmenn Samfylkingarinnar, Viðreisnar og Sjálfstæðisflokksins (margir hverjir) munu styðja málið og leiða í lög. Flokkur fólksins ætlar bara að segja já! „Skoðun mín hef­ur ekk­ert breyst,“ seg­ir Eyj­ólf­ur Ármanns­son, sam­göngu- og sveit­ar­stjórn­ar­ráðherra og þingmaður Flokks fólks­ins, spurður hvort skoðun hans á bók­un 35, um að frum­varpið feli í sér stjórn­ar­skrár­brot, hafi breyst. Sjá slóð: Bókun 35 enn stjórnarskrárbrot

Þingmaðurinn segir að bókunin sé stjórnarskrábrot en ætlar samt ekki að standa í vegi fyrir að málið fari í gegnum þingið!  "Þetta er ekkert stórmál, þannig séð" segir þingmaðurinn. Þetta kallar maður að standa fast á prinsippum, þannig séð! Og hann ætlar ekki að "slíta ríkisstjórn", þannig séð! Fyrir hvaða prinsippum standa þeir þingmenn sem segjast vera mótfallnir ákveðnum málum, sem þeir segja að standi ekki stjórnarskrá, en ætlar samt ekki að gera neitt í málinu? Af hverju eru þeir á þingi yfir höfuð. 

Nýjir þingmenn stjórnarflokkanna vinna nú stjórnarskráeið er þeir setjast á Alþingi, vitandi vísir að þeir ætla að brjóta þann eið í þingstörfum. Í gegnum aldir hafa eiðar Íslendinga haft gildi og verið jafngildir undirskriftum. Eiður var óbrjótanlegur og menn misstu æruna ef þeir brutu hann sem var mesti álitshnekkir sem hægt var að bíða. Á miðöldum voru menn drepnir ef þeir gengu á bak orða sinna.

En hvað gerist þegar bókunin verður samþykkt? Ekkert að því virðist. Nýr dagur rennur upp á ný og lífið gengur sinn vanagang að því virðist. Ekkert hefur breyst...eða hvað? Jú, tifandi tímasprengja hefur verið sett af stað. Þegar örlagaríkir tímar renna upp, þeir gera það alltaf, þá getur reynt á hvort íslensk lög eða evrópsk séu rétthærri. Og það skiptir máli. Hefur einhver gleymt ICESAVE málinu? Hvernig hefði það farið ef bókun 35 hafi þá verið samþykkt?  Það liggur í eðli málsins, að íslenskir hagsmunir fara ekki alltaf saman við heildarhagsmuni ESB.  Þeir hagsmunir eru sniðnir að stærstu aðildarríkjum ESB.

Þegar Ísland var undir stjórn Dani, var landið ekki nýlend, heldur hjálenda. Virðist ekki vera mikill munur á og er ekki. Sérstaklega ekki ef landsmenn eru komnir undir vilja og duttlunga erlendra stórvelda. 

Stórskáldið sagt eitt sinn: „En þegar á íslandsströnd eru risnir þýskir fiskibæir og þýsk kauptún, hve leingi mun þess að bíða að þar rísi og þýskir kastalar með þýskum kastalaherrum og málaliði. Hver er þá orðinn hlutur þeirrar þjóðar sem skrifaði frægar bækur? Þeir íslensku mundu þá í hæsta lagi verða feitir þjónar þýsks leppríkis. Feitur þjónn er ekki mikill maður. Barður þræll er mikill maður, því í hans brjósti á frelsið heima." (Eldur í Kaupinhafn. 13. kafli. Arnas Arnæus.). Menn geta túlkað þessi orð eins og þeir vilja í þessu samhengi.

P.S. Hvað ætlar forseti vor að gera? Skrifa undir?

 

Athugasemdir

[Guðjón E. Hreinberg, 28.12.2024 kl. 15:33]

Hver var forsætisráðherra 1993?

[Birgir Loftsson, 28.12.2024 kl. 17:05]

Hvað segir Wikipedia Guðjón?

[Guðmundur Ásgeirsson, 28.12.2024 kl. 23:19]

Bókun 35 er einfaldlega hluti af þjóðréttarsamningi sem Ísland gerðist aðili að fyrir 30 árum síðan. Það sem er nú til umræðu snýst ekki um það heldur að hún var ekki innleidd réttilega í íslensk lög eins og var gert við meginmál EES samningsins. Til að uppfylla skyldur sínar samkvæmt EES samningnum verður Ísland að sjá til þess að þær reglur sem falla undir samninginn gildi á Íslandi og þar sem löggjafarvald á Íslandi hefur ekki verið framselt til ESB heldur er í höndum Alþingis verður það ekki gert nema með því að samræma íslensk lög við EES reglurnar og innleiða þær þannig í íslenskan rétt.

Frumvarpið sem utanríkisráðherra lagði fram í mars 2023 snýst ekki um neitt annað en þetta, þ.e. að setja í íslensk lög eina stutta og einfalda reglu sem uppfyllir þá skuldbindingu sem kemur fram í bókun 35. Sú regla felur ekki í sér neitt framsal valds til erlenda stofnana og í bókuninni er sérstaklega áréttað að EES samningurinn feli ekki í sér framsal löggjafarvalds. Þessi regla lýtur eingöngu að innbyrðis samspili íslenskra laga. Alþingi gæti þó alltaf vikið frá þeirri reglu ef það vill eins og er sérstaklega tekið fram í frumvarpinu.

Ef forgangsregla samkvæmt bókun 35 hefði verið réttilega innleidd í íslensk lög hefði það engu breytt um niðurstöðu Icesave málsins, því lögin um innstæðutryggingar sem innleiddu samsvarandi EES tilskipun stönguðust ekki á við nein önnur íslensk lög. EFTA dómstóllinn dæmdi Íslandi í vil um að það væri engin ríkisábyrgð á innstæðutryggingasjóðnum og það gerði hann á grundvelli EES reglna. Sigur Íslands í málinu var því ekki "þrátt fyrir" EES reglur og réttarkerfið sem tilheyrir þeim heldur leiddi beinlínis af þeim.

Birgir, heldur þú að eitthvað í frumvarpinu sem tengist bókun 35 stangist á við stjórnarskránna? Ef svo er langar mig að spyrja þig nákvæmlega hvað það er og hvernig?

[Birgir Loftsson, 29.12.2024 kl. 09:36]

Guðmundur, góðan dag. Hef marg oft sagt af hverju ég telji þetta ólög. Breyingin er stutt og lagóð. Hún er eftirfarandi:

Frumvarp til laga 

um breytingu á lögum um Evrópska efnahagssvæðið, nr. 2/1993 (bókun 35).

Frá utanríkisráðherra.

1. gr. 

    4. gr. laganna orðast svo:
    Ef skýrt og óskilyrt lagaákvæði sem réttilega innleiðir skuldbindingu samkvæmt EES-samningnum er ósamrýmanlegt öðru almennu lagaákvæði skal hið fyrrnefnda ganga framar, nema Alþingi hafi mælt fyrir um annað. Sama á við um skuldbindingar sem eru innleiddar með stjórnvaldsfyrirmælum.

Þetta er valdaafsal. 

[Guðmundur Ásgeirsson, 29.12.2024 kl. 17:10]

Sæll Birgir.

Ég hef lesið þetta margoft og kann nánast utanbókar enda er þetta stutta og laggóða ákvæði tiltölulega einfalt.

Hvernig telur þú þetta vera valdaafsal? Hvaða vald myndi þetta eina ákvæði framselja frá hverjum og í hendur hvers?